Fjölskyldusamvera í byrjun aðventu

Minjasafnið og Bókasafnið stóðu saman að fjölskyldusamverustund í byrjun aðventu. Þá var börnum og fjölskyldum þeirra boðið að heimsækja söfnin og leika sér og leysa þrautir í friði frá jólastressi. Meðal þess sem boðið var upp á var jólasveinaratleikur um Minjasafnið sem vakti mikla lukku. Hann fólst í því að leita að þrettán litum jólasveinum, grýlu, leppalúða og jólakettinum en öll höfðu þau falið sig í nálægð við hluti sem tengdust áhugamálum þeirra. Þá var einnig hægt að spila jólabingó, föndra jólaskraut, fræðast um börnin hennar Grýlu og að sjálfsögðu svignuðu hillur bókasafnsins undan jólabókunum. Fjöldi barna og foreldra lagði leið sína á söfnin þennan dag og ekki annað að sjá en að allir væru í sannkölluðu jólaskapi.