Í dag hleypum viðaf stokkunum, vonandi í fyrsta en ekki síðasta sinn, verkefni sem við höfum kosið að kalla Ljóðabærinn Egilsstaðir. Hugmyndin kviknaði í fyrra en þá var sett upp sýning hér í safninu sem hét Ást í 100 ár. Meðal þess sem við gerðum þá var að setja upp ástarljóð Páls Ólafssonar á þrjá húsveggi hér í bæ. Þetta mæltist mjög vel fyrir og margir höfðu orð á því hve þetta lífgaði uppá bæjarmyndina og væri skemmtilegt.

Því tókum við höndum saman, Minjasafnið og Menningarmiðstöð Fljótsdalshéraðs um að útvíkka hugmyndina. Okkur langaði til að skapa einhverja sérstöðu hér í bæ sem gestir tækju eftir og nú er barnið fætt. Í fyrsta skiptið ákváðum við að einbeita okkur að einu skáldi og ekki leið á löngu þar til nafn Hákonar Aðalsteinssonar varð ofan á og prýða nú ljóð hans marga húsveggi hér í bæ og munu birtast á fleiri stöðum á næstu dögum og þá ekki bara hér á Egilsstöðum og í Fellabæ, má t.d. nefna upp á Öræfum, við Snæfellsskála, inní Hallormsstað, í Jökuldal og uppá Vaðbrekku, staðir sem voru Hákoni kærir.

Hákon fæddist á Vaðbrekku í Hrafnkelsdal 13. júlí 1935 og voru foreldrar hans þau Aðalsteinn Jónsson bóndi og Ingibjörg Jónsdóttir húsmóðir. Hann vann fjölbreytt störf um ævina, sem vélstjóri á sjó, við ökukennslu og bifreiðaakstur og þá var hann lengi lögregluþjónn á Egilsstöðum og á Húsavík. Hann fluttist að Húsum í Fljótsdal árið 1992, gerðist skógarbóndi og rak þar ferðaþjónustu ásamt konu sinni, Sigrúnu Benediktsdóttur. Árið 2006 seldu þau hjónin jörðina og fluttust til Egilsstaða. Hákon lést eftir erfið veikindi í mars 2009 á 74. aldursári.

Hákon var landsþekktur hagyrðingur, margar vísur eftir hann orðið fleygar og lög samin við kvæði hans. Af sjö bókum hans eru þrjár ljóðabækur. Ég ætla ekki að þykjast vera neinn sérfræðingur í kveðskap Hákonar en í fljótu bragði sýnist mér hægt að skipta ljóðum hans í nokkra flokka, af þeim mætti nefna tækifærisljóð, náttúruljóð, gamanvísur og rómantík. Við reyndum að velja ljóð úr hverjum „flokki" til að sýna fjölbreytileika skáldskapar hans. Þá lék hann sér að mismunandi bragarháttum og reyndum við einnig að gera því skil. Hér inni í Safnahúsinu er eitt erindi úr Konungsdrápu hans sem hann flutti fyrir Noregskonung til að mótmæla Kárahnjúkavirkjun.

Sigrún eiginkona hans hjálpaði okkur mikið við valið enda þekkir hún hans höfundarverk betur en við sem komum að undirbúningi verkefnisins. En stærstan þátt þar eiga þær Ingunn Þráinsdóttir og Karen Erla Erlingsdóttir auk mín. Um prentun og uppsetningu sá Björgvin hjá Bara snilld ehf. Það var okkur mikið gleðiefni hve vel húseigendur tóku í beiðni okkar um að fá að setja upp ljóð á húsveggi þeirra, án þeirra stuðnings hefði verkefnið ekki getað orðið að veruleika.

Við opnunina munu þau Áslaug Sigurgestsdóttir og Björn Sveinsson kveða nokkur kvæði Hákonar sem sett verða upp annars staðar á Fljótsdalshéraði og að því loknu ganga gestir saman niður í Sláturhús og stoppa á nokkrum völdum stöðum og hlusta á þau fara með ljóðin sem hanga uppi á húsveggjum á leið okkar þangað.

Frekari upplýsingar og ljóðin sjálf má nálgast hér .