Í sumar (14. júní – 15. ágúst) verður opnunartími verulega lengdur á safninu. Mánudaga til fimmtudaga verður opið til 21 á kvöldin og er það gert til að koma til móts við þann fjölda ferðamanna sem koma í Egilsstaði síðla dags til næturdvalar, borða hér kvöldverð og vantar síðan oft einhverja afþreyingu að honum loknum.

 

Á þriðjudagskvöldum á tímabilinu 29. júní til 10. ágúst verður boðið upp á dagskrá fyrir gesti sem við kjósum að kalla Sumarblót. Gestir eru fræddir um líf og hefðir Íslendinga áður fyrr á þorranum, fá innsýn í heimkynni fólks, hvernig tekið var á móti þorra og hvaða merkingu sá árstími hafði fyrir marga. Einnig fylgir fróðleikur um þorrablót og gestir læra einfaldan vikivaka. Í lokin er svo boðið upp á hákarl og harðfisk og að því loknu skoða gestir safnið.

Dagskráin hefst kl. 19.30, verð er 1.000 kr. fyrir fullorðna og 600 kr. fyrir börn yngri en 16 ára og ellilífeyrisþega.

 

Í kjallara Safnahússins hefur verið sett upp snertisafn sem er fyrir alla, unga sem aldna, sem vilja snerta hluti og prófa safngripina.