Undanfarnar vikur hafa þjóðsagnapersónur lifnað við með aðstoð nemenda á yngsta stigi í nokkrum grunnskólum í Múlaþingi. Vinnan fór fram í sérstökum smiðjum sem Minjasafn Austurlands bauð upp á í tengslum við BRAS, menningarhátíð barna og ungmenna á Austurlandi. 

Þetta er í þriðja sinn sem Minjasafn Austurlands býður upp á þessar smiðjur en í fyrra varð lítið úr þeim vegna heimsfaraldurs. Markmiðið með smiðjunum er að kynna þjóðsagnaarfinn fyrir nemendum í gegnum skapandi vinnu. Nemendur fá fræðslu um þjóðsögurnar og búa síðan til hreyfimynd (stop motion) eftir sögu að eigin vali. Námsefni minjasafnsins um Sigfús Sigfússon, þjóðsagnasafnara frá Eyvindará, er lagt til grundvallar en kennarar velja að hve miklu leyti nemendur vinna með efnið áður en þeir mæta í smiðjurnar.

Sumir hópar komu í heimsókn á safnið og unnu sínar myndir þar á meðan aðrir völdu að fá kynningu á verkefninu í skólanum og vinna verkefnið síðan þar undir handleiðslu kennara. Það skorti ekkert á sköpunarkraftinn og ímyndunaraflið og urðu myndirnar hver annarri frumlegri og skemmtilegri en þær er nú hægt að sjá í Safnahúsinu (á þriðju hæð, fyrir framan bókasafnið). 

Í ár bauð safnið einnig upp á smiðju fyrir miðstig þar sem nemendur unnu með myndmál Valþjófsstaðahurðarinnar. Nánar má lesa um hana hér.