Heilög Barbara komin austur aftur
Keyrt inn í Fljótsdal í dag í glampandi sólskini svo landið var skínandi bjart og fagurt. Nathalie Jacquement forvörður á Þjóðminjasafni Íslands kom austur færandi hendi til Skriðuklausturs, nánar tiltekið með styttuna af heilagri Barböru og fleiri dýrgripi sem fundust í uppgreftrinum á Skriðuklaustri og verða til sýnis á Skriðuklaustri í húsi Gunnars Gunnarssonar skálds frá og með 1. maí. Sýningin er þess virði að skoða hana enda um merka forngripi að ræða og á örugglega eftir að vekja verðskuldaða athygli í vor og sumar. Sýningarlok eru í haust en nánari upplýsingar gefur Gunnarsstofnun. (Sjá um styttuna af heilagri Barböru á vefsíðu Þjóðminjasafnsins.)
Heimsókn frá Noregi
Í síðustu viku, dagana 15.-17. apríl, voru góðir gestir í heimsókn á Austurlandi, Norðmennirnir Erik Bugge, verkefnisstjóri hjá Kulturkontakt Vesterålen, og Geir Are Johansen, forstöðumaður Museum Nord. Tilefni heimsóknarinnar voru hugleiðingar um samband og samvinnu menningarstofnana og safna í Vesterålen og á Íslandi, en menningarlíf á Austurlandi hefur áður notið góðs af slíku samstarfi og drifkrafti Eriks Bugge í því sambandi. Erik og Geir litu m.a. við hjá Minjasafni Austurlands ásamt því að heimsækja fleiri söfn og staði hér fyrir austan.
Vorverk
Erum í vorkverkum í snjókomunni, málningarvinnu í sýningarsal er lokið, undirbúningur og skipulagning sýningarhalds í sumar er hafin.
Úr starfinu
Vetrartíminn er fyrst og fremst nýttur til starfa sem ekki gefst tími til að sinna að sumrinu þegar sýningahald og móttaka ferðamanna tekur drýgsta tímann. Safnverðir Minjasafnsins hafa af vandvirkni og eljusemi unnið mikið verk í vetur við að skrá og ganga frá munum safnsins. Ein afhending sem safninu barst nú í vetur voru munir úr fórum Ástu Aðalheiðar Erlendsdóttur og bróður hennar Jóns Kristbers frá Halagerði í Fáskrúðsfirði, og er skráningu, ljósmyndun og merkingum á þessum hlutum að verða lokið.
Mynd; Unnur K
