Nýr "starfsmaður" hefur bæst í starfsmannaflóru Minjasafnsins. Þar er á ferð hreinkýrin Hreindís sem hefur verið "ráðin" til að taka vel á móti yngri gestum safnsins. 

Hreindís er teiknuð af listakonunni Hrafnsunnu Ross. Markmið hennar er að efla Minjasafnið sem ákjósanlegan áfangastað fyrir börn og barnafjölskyldur og bæta miðlun safnsins til yngri kynslóðarinnar. Hreindís hefur nú komið sér vel fyrir í splunkunýju krakkahorni í sýningarsal Minjasafnsins sem opnað var 17. júní síðastiðinn en þar er að finna margvíslegan fróðleik og afþreyingu fyrir yngri gesti safnsins. Meðal annars er hægt að máta víkingabúninga, leika sér með leikföng fyrri tíma, hlusta á þjóðsögur úr safni Sigfúsar Sigfússonar, mála myndir í anda Kjarvals, leysa þrautir tengdar hreindýrum og margt fleira. 

Þá hefur Hreindís komið fyrir aðgengilegum fróðleiksmolum fyrir víðsvegar um sýningar safnsins þar sem yngri kynslóðin getur aflað sér upplýsinga um það sem fyrir augu ber.

Við minnum á að frítt er inn á safnið fyrir börn yngri en 18 ára. Safnið er opið alla daga í sumar, frá 10:00-18:00. 

Verkefnið var styrkt af Safnaráði.