Húsfyllir var á jólasamveru Safnahússins sem fram fór í gær. Viðburðurinn var samstarfsverkefni Bókasafns Héraðsbúa og Minjasafns Austurlands. 

Yfir 100 manns, börn og fullorðnir, mættu í húsið og tóku þátt í því sem þar var boðið uppá. Á Minjasafninu var hægt að spreyta sig á jólasveinaratleik og líta inn í Grýluhelli sem óvænt birtist í sýningarsal safnsins í byrjun aðventu.Á bókasafninu voru lesnar jólasögur og hægt að perla jólaskraut. Síðast en ekki síst gátu gestir skreytt kerti undir handleiðslu Guðrúnar Sigurðardóttur sem vakti mikla lukku. Þá var opnuð ný sýning í sýningarskápnum þá þriðju hæð hússins en þar mátt skoða margvísleg leikföng og jólagjafir fyrri tíma. 

Um leið og við þökkum öllum fyrir komuna minnum við á að Minjasafnið verður opið í desember alla virka daga milli kl. 11:00 og 16:00 þar sem hægt er að kíkja í grýluhellinn, leita að jólasveinunum og taka þátt í veður-ratleik. Lokað verður frá og með 23. desember til og með 1. janúar.