Fimmti fyrirlesturinn í fyrirlestrarröðinni Nýjustu fræði og vísindi fór fram í fundarsal Austurbrúar á Egilsstöðum í gær. Þar fjallaði Guðrún Óskarsdóttir, gróðurvistfræðingur hjá Náttúrustofu Austurlands um gróðurframvindu í lúpínubreiðum á Austurlandi. Fyrirlesturinn var vel sóttur og sköpuðust líflegar umræður í kjölfar hans.

Fyrirlesturinn var síðasti fyrirlesturinn í bili í fyrirlestrarröðinni Nýjustu fræði og vísindi en að henni stóðu Rannsóknarsetur Háskóla Íslands á Austurlandi, Héraðsskjalasafn Austfirðinga, Minjasafn Austurlands, Gunnarsstofnun, Sögufélag Austurlands og Hallormsstaðaskóli. Markmið raðarinnar var að skapa vettvang fyrir fræðifólk til að miðla rannsóknum sínum og niðurstöðum til almennings á Austurlandi.

Efnistök voru fjölbreytt í vetur. Erla Hulda Halldórsdóttir, prófessor í sagnfræði fjallaði um bréfasafn Páls Pálssonar frá Hallfreðastöðum; Eyjólfur Eyjólfsson þjóðfræðingur fjallaði um baðstofuna og tónlistararfinn í nýju samhengi; Hrafnkatla Eiríksdóttir, sníkjudýra- og þjóðfræðingur fyrirlestur um óhefðbundnar sauðfjárlækningar fyrr og nú; Sigurður Högni Sigurðsson sagnfræðingur sagði frá ættar- og vináttutengslum í samfélagi austfirskra bænda á ofanverðri átjándu öld og síðast en ekki síst fjallaði Guðrún Óskarsdóttir um gróðurframvindu í lúpínubreiðum eins og áður sagði. 

Fyrirlestrarröðin hlaut styrk úr Safnasjóði og hægt er að nálgast upptökur af fyrirlestrunum á Youtube-síðu Skriðuklausturs.